មគ្គុទ្ទេសក៍សាមញ្ញសម្រាប់រៀបចំថវិកា

ការរស់នៅ​សម្រាប់តែមួយគ្រប់លើការចំណាយប្រចាំថ្ងៃអាចនាំឱ្យយើងមាន​អារម្មណ៍​ថាដូចជា​កំពុងរត់​លើ​ម៉ាស៊ីន​ហាត់ប្រាណ​ដែល​មិន​ចេះឈប់នោះដែរ​។ ប្រសិនបើអ្នកពឹងផ្អែកលើកាតឥណទានដើម្បីទូទាត់ការចំណាយគោលៗ ឬឆ្ងល់ថាតើលុយរបស់អ្នកបាត់ទៅណាជារៀងរាល់ខែ គឺមិនមែនមានតែអ្នកនោះទេ ហើយក៏មិនមានន័យថាអ្នកគ្មានអំណាចក្នុងការកែប្រែបាននោះដែរ។ ការរៀបចំកញ្ចប់ថវិកាអាចជារឿងគួរឱ្យភ័យខ្លាច ប៉ុន្តែវាគឺជាឧបករណ៍មួយក្នុងចំណោមឧបករណ៍ដ៏មានប្រសិទ្ធភាពបំផុតដើម្បីអាចគ្រប់គ្រង និងកសាងស្ថិរភាពហិរញ្ញវត្ថុឡើងវិញ ទោះបីជាត្រូវក្បិតក្បៀតលុយក៏ដោយ។

មូលហេតុដែលការរៀបចំកញ្ចប់ថវិកានៅតែមានប្រសិទ្ធភាព – សូម្បីតែពេលអ្នកកំពុងជួបការលំបាកក៏ដោយ

នៅពេលដែលប្រាក់ខែដែលមិនទាន់ទាំងចូលគណនីផង តែត្រូវកាត់កងចាត់ចែងបង់នេះបង់នោះអស់ទៅហើយនោះ ការរៀបចំកញ្ចប់ថវិកា អាចនឹងមើលទៅហាក់ដូចជាគ្មានប្រយោជន៍ឡើយ។ ប៉ុន្តែផ្ទុយទៅវិញ វាពិតជាបានជួយផ្តល់ភាពច្បាស់លាស់ដល់អ្នក។ វាជួយអ្នករកឃើញទម្លាប់ កំណត់អត្តសញ្ញាណការខ្ជះខ្ជាយ និងធ្វើការសម្រេចចិត្តប្រកបដោយបំណង។ ការរៀបចំកញ្ចប់ថវិកាមិនមែនផ្តោតលើការរឹតត្បិតទេ វាផ្តោតលើការការយល់ដឹង។ 

ជំហានទី 1៖ ដឹងអំពីប្រាក់ចំណូលប្រចាំខែរបស់អ្នក

ចាប់ផ្តើមជាមួយនឹងប្រាក់ចំណូលសរុបប្រចាំខែរបស់អ្នក។ នេះរួមបញ្ចូលទាំង៖

ប្រភេទនៃការចំណាយទូទៅរួមមាន៖

• ប្រាក់ខែទៀងទាត់របស់អ្នក

• ប្រាក់ចំណូលបន្ថែម ឬប្រាក់ចំណូលការងារឯករាជ្យណាមួយ

• អត្ថប្រយោជន៍ ឬការគាំទ្រពីរដ្ឋាភិបាល

• ប្រាក់ឧបត្ថម្ភកូន ឬប្រាក់អាហារូបត្ថម្ភសម្រាប់អតីតប្តី/ប្រពន្ធ

• ប្រភពលុយផ្សេងទៀតដែលជាប់លាប់

កត់ចំណាំតួលេខនេះ។ វាជាមូលដ្ឋានគ្រឹះរបស់អ្នក។ 

ជំហានទី 2៖ រាយបញ្ជីការចំណាយថេររបស់អ្នក

បន្ទាប់មក សូមកំណត់អត្តសញ្ញាណថ្លៃវិក្កយបត្រកើតមានប្រចាំខែរបស់អ្នក។ តួលេខទាំងនេះគឺជាការចំណាយដែលមិនអាចចរចាបាន – ខ្ទង់ចំណាយដែលមានចំនួនដដែលជារៀងរាល់ខែ៖ 

• ថ្លៃជួលផ្ទះ ឬ ប្រាក់បង់រំលស់ 
• សេវាប្រើប្រាស់ (អគ្គិសនី ទឹក សាំង) 
• គម្រោងទូរសព្ទ និងអ៊ីនធឺណិត 
• ការសងបំណុល (កាតឥណទាន ប្រាក់កម្ចី) 
• បុព្វលាភធានារ៉ាប់រង 
• ថ្នាំតាមវេជ្ជបញ្ជា ឬការចំណាយទាក់ទងនឹងសុខភាព 

បូកបញ្ចូលវា​ទាំងអស់នេះ។ ដកចំនួនសរុបនេះចេញពីប្រាក់ចំណូលប្រចាំខែរបស់អ្នក។ ចំនួនទឹកប្រាក់ដែលនៅសល់គឺជាចំនួនដែលអ្នកត្រូវប្រើសម្រាប់អ្វីៗផ្សេងទៀត។

ជំហានទី 3៖ បំបែកការចំណាយអថេររបស់អ្នក

យកចំនួនដែលនៅសល់ ហើយចែកវាជាបួនប្រភេទ៖ 

• ម្ហូបអាហារ – គ្រឿងទេស អាហារខ្ចប់ទិញទៅផ្ទះ ញ៉ាំអាហារនៅខាងក្រៅ 
• ការធ្វើដំណើរ – ប្រេងឥន្ធនៈ មធ្យោបាយធ្វើដំណើរសាធារណៈ កន្លែងចតរថយន្ត ការថែទាំរថយន្ត 
• ការសន្សំ – ទោះបីចំនួនតិចតួចក៏សំខាន់ដែរ 
• អ្វីៗផ្សេងទៀត – សម្លៀកបំពាក់ ការកម្សាន្ត អំណោយ គ្រាអាសន្ន 

ដើម្បីប៉ាន់ប្រមាណចំនួនដែលអ្នកចំណាយជាធម្មតាក្នុងប្រភេទនីមួយៗ សូមត្រឡប់ទៅមើលរបាយការណ៍ធនាគាររយៈពេលបីខែចុងក្រោយរបស់អ្នក។ ការធ្វើបែបនេះជួយអ្នកបង្កើតតួលេខពិតប្រាកដដោយផ្អែកលើទម្លាប់ជាក់ស្តែងរបស់អ្នក។ 

ជំហានទី 4៖ ចាប់ផ្តើមការសន្សំប្រាក់—ទោះបីជាវាមានចំនួនតិចតួចក្តី

ប្រសិនបើអ្នកមានលុយនៅសល់បន្ទាប់ពីចំណាយលើអាហារ និងថ្លៃធ្វើដំណើររួច សូមចែកវាជាពីរចំណែក៖ 

• ដាក់ពាក់កណ្តាលទៅក្នុងប្រាក់សន្សំ 
• ប្រើពាក់កណ្តាលទៀតសម្រាប់ការចំណាយផ្សេងៗ 

ប្រសិនបើនៅចុងខែ អ្នកសល់ប្រាក់បន្ថែម សូមអបអរជ័យជម្នះនោះ ហើយដាក់វាទៅក្នុងប្រាក់សន្សំរបស់អ្នក។ ទោះបីជាដប់ ឬម្ភៃប្រាំដុល្លារក្នុងមួយខែក្តី វានឹងកើនឡើងបន្តិចម្តងៗទៅតាមពេលវេលា ហើយជួយបង្កើតជាលុយបម្រុង សម្រាប់ទ្រទ្រង់ហិរញ្ញវត្ថុរបស់អ្នក។ 

គន្លឹះ៖ ការដាក់បញ្ចូលសាច់ប្រាក់បន្ថែមទៅក្នុងបំណុលដែលមានការប្រាក់ ដូចជាកាតឥណទាន និងប្រាក់កម្ចីផ្ទាល់ខ្លួន គឺជាទម្រង់នៃការសន្សំមួយ។ រាល់ប្រាក់មួយដុល្លារនីមួយៗដែលអ្នកដាក់នៅទីនោះ នឹងកាត់បន្ថយចំនួនការប្រាក់ដែលអ្នកត្រូវបង់ ដែលជួយសន្សំប្រាក់សម្រាប់អ្នកនាពេលអនាគត។ 

គន្លឹះដើម្បីធ្វើឱ្យការរៀបចំកញ្ចប់ថវិកាកាន់តែងាយស្រួល

• ប្រើកម្មវិធីរៀបចំថវិកាដើម្បីតាមដានការចំណាយដោយស្វ័យប្រវត្តិ។ ធនាគារមួយចំនួនផ្តល់ជូនសេវាតាមដានដោយឥតគិតថ្លៃនៅក្នុងកម្មវិធីរបស់ពួកគេ 
• កំណត់ការរំលឹកលើប្រតិទិនសម្រាប់កាលបរិច្ឆេទដល់កំណត់បង់វិក្កយបត្រដើម្បីជៀសវាងថ្លៃសេវាយឺតយ៉ាវ 
• ប្រសិនបើអ្នកត្រូវការបង់វិក្កយបត្រយឺតជាងថ្ងៃកំណត់ សូមទូរសព្ទស្នើសុំរយៈពេលអនុគ្រោះ 
• សាកល្បងវិធីសាស្ត្រស្រោមសំបុត្រសម្រាប់ការចាយជាសាច់ប្រាក់ ប្រសិនបើអ្នកមានទំនោរចំណាយលើសការកំណត់ 
• ពិនិត្យមើលថវិការបស់អ្នកជារៀងរាល់ខែ ហើយកែសម្រួលតាមការចាំបាច់។ មិនមែនរាល់ខែទាំងអស់នឹងដូចគ្នានោះទេ ហើយករណីនេះមិនជាបញ្ហាឡើយ 
• សូមពិចារណាទិញអាហារក្នុងបរិមាណច្រើន។ ចូលរួមក្រុមទិញអាហារបរិមាណច្រើន ឬទិញចូលគ្នាជាមួយមិត្តភក្តិ ក្រុមគ្រួសារ និងអ្នកជិតខាង ដើម្បីសន្សំប្រាក់លើអាហារ។ 
• សូមអានប្លក់ការគ្រប់គ្រងបំណុលរបស់យើងសម្រាប់គន្លឹះអំពីរបៀបបង្កភាពកាន់តែងាយស្រួលក្នុងការបង់វិក្កយបត្រ។ 

យោបល់ចុងក្រោយ 

ការរស់នៅ​សម្រាប់តែបង្គ្រប់ការចំណាយប្រចាំថ្ងៃ​គឺជា​រឿង​ដែល​តានតឹងមួយ ប៉ុន្តែ​វា​មិនចាំបាច់​ជារឿង​អចិន្ត្រៃយ៍​នោះទេ។ ការរៀបចំកញ្ចប់ថវិកាផ្តល់អំណាចដល់អ្នកក្នុងការមើលឃើញលុយរបស់អ្នកយ៉ាងច្បាស់ និងធ្វើការសម្រេចចិត្តដោយមានព័ត៌មានគ្រប់គ្រាន់។ អ្នកមិនចាំបាច់ល្អឥតខ្ចោះទេ – អ្នកគ្រាន់តែត្រូវចាប់ផ្តើមប៉ុណ្ណោះ។ រាល់ជំហានដែលអ្នកអនុវត្តទៅរកការយល់ដឹងអំពីហិរញ្ញវត្ថុ គឺជាជំហានមួយឆ្ពោះទៅរកសេរីភាព។ 

* ឧបករណ៍ទាំងនេះគឺជាការផ្តល់យោបល់ មិនមែនជាច្បាប់ទេ។ កញ្ចប់ថវិកាដ៏ល្អបំផុតគឺជាកញ្ចប់ថវិកាដែលមានប្រសិទ្ធភាពសម្រាប់អ្នក – ដូច្នេះសូមធ្វើការផ្លាស់ប្តូរតាមការចាំបាច់។