មគ្គុទ្ទេសក៍ដើម្បីស្វែងយល់ពីជំងឺទឹកនោមផ្អែម និងស្ថានភាពជិតមានជំងឺទឹកនោមផ្អែមរបស់អ្នក

ជំងឺទឹកនោមផ្អែម និងស្ថានភាពជិតមានជំងឺទឹកនោមផ្អែមគឺជាស្ថានភាពសុខភាពដែលប៉ះពាល់ដល់មនុស្សរាប់លាននាក់។ មគ្គុទេសក៍នេះពន្យល់អំពីជំងឺទឹកនោមផ្អែម និងស្ថានភាពជិតមានជំងឺទឹកនោមផ្អែម និងរបៀបដែលអ្នកអាចគ្រប់គ្រង ឬបង្ការវា។ 

តើអ្វីទៅជាជំងឺទឹកនោមផ្អែម? 

ជំងឺទឹកនោមផ្អែមកើតឡើង នៅពេលដែលរាងកាយមានការលំបាកក្នុងការប្រើប្រាស់ជាតិស្ករពីអាហារ។ បញ្ហានេះធ្វើឱ្យកម្រិតជាតិស្ករក្នុងឈាមខ្ពស់ខ្លាំង ដែលអាចបង្កគ្រោះថ្នាក់ ប្រសិនបើបន្តកើតមានយូរតទៅទៀត។ 

រាងកាយត្រូវការអ័រម៉ូនមួយហៅថា អាំងស៊ុយលីន ដើម្បីបំប្លែងជាតិស្ករទៅជាថាមពល។ នៅក្នុងជំងឺទឹកនោមផ្អែម រាងកាយមិនអាចផលិតអាំងស៊ុយលីនបានគ្រប់គ្រាន់ ឬមិនអាចប្រើវាបានត្រឹមត្រូវ។ ប្រសិនបើ​ជំងឺ​ទឹកនោមផ្អែម​មិន​ត្រូវបាន​ព្យាបាល​ទេ វា​អាច​នាំឱ្យ​មាន​បញ្ហា​ជាមួយ​បេះដូង តម្រងនោម សរសៃប្រសាទ និង​គំហើញ។ 

ជំងឺទឹកនោមផ្អែមមាន 3 ប្រភេទសំខាន់ៗ៖ 

• ប្រភេទទី 1៖ ស្ថានភាពជំងឺស្វ័យសុំាដែលអាចវិវឌ្ឍចំពោះកុមារ ឬមនុស្សវ័យជំទង់ និងត្រូវការការចាក់អាំងស៊ុយលីនប្រចាំថ្ងៃ។ 

• ប្រភេទទី 2៖ ទម្រង់ទូទៅនៃជំងឺទឹកនោមផ្អែម ជាពិសេសចំពោះមនុស្សពេញវ័យ ដែលបណ្តាលមកពីភាពប្រឆាំងនឹងអាំងស៊ុយលីន។ ជារឿយៗយើងអាចគ្រប់គ្រងបញ្ហានេះបាន តាមរយៈការផ្លាស់ប្តូររបៀបរស់នៅ ការប្រើថ្នាំតាមផឹក ឬការព្យាបាលដោយអាំងស៊ុយលីន។ ស្វែងយល់បន្ថែមអំពីភាពប្រឆាំងនៃអាំងស៊ុយលីន និងជំងឺទឹកនោមផ្អែមប្រភេទទី 2 ពី CDC។ 

• ការមានផ្ទៃពោះ៖ កើតឡើងក្នុងអំឡុងពេលមានផ្ទៃពោះ ដោយសារតែការផ្លាស់ប្តូរអ័រម៉ូនបណ្តាលឱ្យមានភាពប្រឆាំងនឹងអាំងស៊ុយលីន។ ជាធម្មតា វាបាត់ទៅវិញក្រោយពេលសម្រាលកូនរួច ប៉ុន្តែបង្កើនហានិភ័យនៃការវិវត្តទៅជាជំងឺទឹកនោមផ្អែមប្រភេទទី 2 នៅពេលក្រោយ។ 

តើស្ថានភាពជិតមានជំងឺទឹកនោមផ្អែមជាអ្វី? 

ស្ថានភាពជិតមានជំងឺទឹកនោមផ្អែមគឺជា​សញ្ញា​ព្រមាន​មួយ​ដែល​បង្ហាញថា កម្រិត​ជាតិ​ស្ករ​ក្នុង​ឈាម​របស់​អ្នក​ខ្ពស់​ជាង​ធម្មតា ប៉ុន្តែ​មិន​ខ្ពស់​គ្រប់គ្រាន់​ដែលអាចចាត់ទុកជា​ជំងឺ​ទឹកនោមផ្អែមនៅឡើយទេ​។ វាមានន័យថាអ្នកមានហានិភ័យនៃការវិវត្តទៅជាជំងឺទឹកនោមផ្អែមប្រភេទទី 2 នាពេលអនាគត។ តាមរយៈការផ្លាស់ប្តូររបៀបរស់នៅដែលល្អដល់សុខភាព មនុស្សជាច្រើនអាចបង្ការ ឬពន្យារការកើតជំងឺទឹកនោមផ្អែមប្រភេទទី 2 បាន។ 

ភាពខុសគ្នារវាងជំងឺទឹកនោមផ្អែម និងស្ថានភាពជិតមានជំងឺទឹកនោមផ្អែម 

• កម្រិតជាតិស្ករក្នុងឈាម៖ ភាពខុសគ្នាចម្បងរវាងជំងឺទឹកនោមផ្អែម និងស្ថានភាពជិតមានជំងឺទឹកនោមផ្អែមគឺថាកម្រិតជាតិស្ករនៃការតមអាហារក្នុងឈាមមានលក្ខណៈខុសគ្នា។ ស្វែងយល់បន្ថែមអំពីក្រុមផ្សេងៗពី CDC។ 
• រោគសញ្ញា៖ ស្ថានភាពជិតមានជំងឺទឹកនោមផ្អែម ជាធម្មតាមិនបណ្តាលឱ្យមានរោគសញ្ញាណាមួយឡើយ។ ទោះជាយ៉ាងណាក៏ដោយ ជំងឺទឹកនោមផ្អែមអាចបង្កើនការស្រេកទឹក នោមញឹកញាប់ ស្រកទម្ងន់ដោយមិនបានព្យាយាម មានអារម្មណ៍អស់កម្លាំងខ្លាំង និងស្រវាំងភ្នែក។ 
• ការព្យាបាល៖ ស្ថានភាពជិតមានជំងឺទឹកនោមផ្អែម ជារឿយៗអាចបាត់ទៅវិញតាមរយៈទម្លាប់ដែលល្អដល់សុខភាព ខណៈដែលជំងឺទឹកនោមផ្អែម ជាពិសេសប្រភេទទី 1 ជាធម្មតាត្រូវការការព្យាបាលជាប្រចាំ ដូចជាអាំងស៊ុយលីនជាដើម។ ត្រូវពិគ្រោះជាមួយវេជ្ជបណ្ឌិតរបស់អ្នកជានិច្ច ដើម្បីស្វែងរកការព្យាបាលដ៏ល្អបំផុតសម្រាប់អ្នក។